તા. 1-4-2017, દાર-એ-સલામ
પૂજા પૂર્ણ કરીને સ્વામીશ્રી ‘યોગીસદન’ના નીચેના હૉલમાં પધાર્યા. અહીં કેટલાક હરિભક્તો પેન્સિલના રંગોથી આફ્રિકા ખંડના વિવિધ વિભાગોને રંગી રહ્યા હતા.
તે જોનાર એક હરિભક્ત કહે : ‘આમ આફ્રિકા ન રંગાય.’
રંગતા હરિભક્તોએ પૂછ્યું : ‘તો પછી કેવી રીતે રંગાય ?’
આ પ્રશ્નનો ઉત્તર સ્વામીશ્રી પર છોડવામાં આવ્યો.
સ્વામીશ્રી કહે : ‘વર્તનથી.’
એક જ શબ્દમાં સચોટ ઉપાય સ્વામીશ્રીએ બતાવી દીધો.
આગળ નાના-નાના બાળકો ફુગ્ગા લઈને ઊભા હતા. તે ફુગ્ગાઓ પર કંઈક ને કંઈક લખેલું હતું. પહેલા વૃંદ પાસે સ્વામીશ્રી પધાર્યા. આ વૃંદના બાળકોના ફુગ્ગા પર ત્રણ વસ્તુ લખેલી હતી : ‘સુહૃદભાવ, અભાવ અને ભક્તિ.’
સ્વામીશ્રીને પૂછવામાં આવ્યું : ‘આમાંથી કયો ફુગ્ગો પસંદ કરીએ તો સત્સંગમાં દૃઢતા રહે ?’
સ્વામીશ્રીએ ‘સુહૃદભાવ’ લખેલો ફુગ્ગો પસંદ કર્યો.
બીજા વૃંદનો પ્રશ્ન હતો : ‘અંતરમાં ટાઢું કેવી રીતે રહે ?’
ઉત્તરરૂપે ત્રણ ફુગ્ગા પર ક્રમશઃ લખેલું હતું : ‘ખપ, શ્રદ્ધા અને દ્રોહ.’
સ્વામીશ્રીએ ‘ખપ’ લખેલો ફુગ્ગો પસંદ કર્યો.
ત્રીજા વૃંદનો પ્રશ્ન હતો : ‘કયો ગુણ કેળવીએ તો નિશ્ચય રહે ?’
જવાબરૂપે ત્રણ ફુગ્ગા પર ક્રમાનુસાર લખેલું હતું : ‘અવગુણ, સેવા અને મહિમા.’
સ્વામીશ્રીએ ‘મહિમા’ લખેલા ફુગ્ગાને પસંદ કર્યો.
ચતુર્થ વૃંદનો પ્રશ્ન રજૂ થયો : ‘કયા ગુણથી સત્સંગમાં આગળ વધાય ?’
જવાબરૂપે ફુગ્ગાઓ પર લખેલું હતું : ‘એકતા, કુસંપ અને દિવ્યભાવ.’
સ્વામીશ્રીએ ‘દિવ્યભાવ’ પર પસંદગી ઢોળી.