તા. 25-2-2010, સારંગપુર
ન્યૂયોર્ક રહેતા ભરતભાઈ પટેલ(ભાવપુરા)નો ફોન આવ્યો. તેઓએ સ્વામીશ્રીને વાત કરતાં કહ્યું : ‘1998થી ગ્રીનકાર્ડનો પ્રોસેસ ચાલુ કર્યો હતો. વચ્ચે 18 વખત આપના આશીર્વાદ લીધા હતા. દર વખતે આપ કહેતા હતા કે ધીરજ રાખજો, ભગવાન બધું સારું કરશે. અને બે દિવસ પહેલા જ ઘેરબેઠાં ગ્રીનકાર્ડ આવી ગયું.’
આ સમાચાર સાંભળીને રાજી થઈને સ્વામીશ્રી કહે : ‘તમે ધીરજ રાખી એટલે તમને ધન્ય છે. ભગવાનમાં શ્રદ્ધા અને વિશ્વાસ હતાં તો કામ થયું છે.’
ફોન પૂરો થયા પછી વળી સ્વામીશ્રીએ તેઓનાં વખાણ કરતાં સંતોને કહ્યું : ‘એની ધીરજને કેટલું ધન્ય છે ! અઢાર વખત આશીર્વાદ લીધા તોય મનમાં શંકા ન ગઈ અને ધીરજ ના ડગી. એના પરિવારની ધીરજ પણ ના ડગી, એટલે મહારાજે કામ કર્યું.’