સ્વામીશ્રી હરિભક્તોને મુલાકાત આપી રહ્યા હોય એ દર્શન અત્યંત પ્રેરક અને ભાવસભર હોય છે. પાણીનું એક પણ ટીપું લીધા વગર સ્વામીશ્રી રોજના દોઢસોથી વધારે હરિભક્તોને મળતા હોય છે. એમાં પણ પસાર થતા હરિભક્તોના પ્રશ્નને સાંભળીને, એ પ્રશ્નમાં સંતોષજનક આશીર્વાદ આપવામાં સ્વામીશ્રી ક્યારેય ધીરજ ગુમાવતા નથી. પળે પળે પ્રશ્નોની ભૂમિકાઓ બદલાય છતાં સ્વામીશ્રી આ ઉંમરે પણ એ ભૂમિકા સાથે તાદાત્મ્ય સાધીને તેઓને પ્રેમથી આશીર્વાદ આપે છે.

આજે પણ સૌને મળ્યા પછી સ્વામીશ્રી લિફ્‌ટ દ્વારા બારમે માળે આવતા હતા. એ દરમ્યાન અમૃતવદન સ્વામી કહે : ‘આ ઉંમરે પણ હરિભક્તોને મળવામાં આપની શ્રદ્ધા બહુ છે, થાકતા જ નથી.’

સહજભાવે સ્વામીશ્રી કહે : ‘તમે બધા સંતો પણ કરો જ છો ને !’ સ્વામીશ્રીએ વાતને સામાન્ય કરી નાખી.