તા. 22-5-2010, ગુણાતીતનગર (ભાદરા)
સમય થતાં સ્વામીશ્રી આરામમાં પધાર્યા. પડદા બંધ થયા, લાઇટો બંધ થઈ, પછી સ્વામીશ્રીએ કોઠારી ધર્મકુંવર સ્વામીને બોલાવ્યા અને સામેથી જ વાત કરતાં કહ્યું કે ‘ચંદ્રકાન્તભાઈ પૂજારાથી માંડીને જેઓએ મંદિરની સેવા કરી છે એ સૌનો ફોટો મંદિર ઉપર પાડવો છે.’ સ્વામીશ્રીએ ઝીણવટથી બધી ચર્ચા કરીને લગભગ વીસેક મિનિટ સુધી હરિભક્તોને યાદ કર્યા અને બોલાવી લેવા સૂચના આપી. એ પ્રમાણે ચંદ્રાકાન્તભાઈ પૂજારા, કુમારભાઈ પૂજારા, ધ્રુવ પૂજારા અને તેઓની સાથે દાજીબાપુ પરિવારમાં ઉપસ્થિત જે કોઈ હોય એ શંભુસિંહ અને હિતેન્દ્રસિંહ તથા હરીશભાઈ ભૂપતાણી વગેરેને યાદ કરીને બોલાવી લેવા સૂચના આપી ને સાથે સાથે પારાયણ કરાવનાર ગિરધરભાઈ ઘાડિયાને પણ હાજર રાખવા વાત કરી. આ રીતે સૂતાં સૂતાં પણ સ્વામીશ્રીએ સૌની ચિંતા કરી. ફોટો પડાવવાની ક્રિયા નાની છે, પણ સ્વામીશ્રી સૌને યાદ રાખે છે એ વાત કેટલી મોટી છે !!