તા. 14-5-2010, અમદાવાદ
આજે સાંજે વિદાય લેવાની હતી. વિમાન દ્વારા જામનગર થઈને સ્વામીશ્રી ભાદરા પધારવાના હતા. 4:30 વાગ્યાનો નીકળવાનો સમય હતો, પરંતુ હરિભક્તોની ભક્તિભાવના એવી કે છેલ્લી ક્ષણોએ પણ સ્વામીશ્રીનાં સૌથી નજીક દર્શન થાય અને એટલા માટે જ અસહ્ય ગરમીમાં 3:00 વાગ્યાથી તો મંદિરનું પરિસર ઊભરાવા લાગ્યું હતું. અમદાવાદમાં અત્યારે 40 ડિગ્રી (સે.) ગરમી વરસી રહી હતી. ફરસ ઉપર પાપડ મૂકો તો શેકાઈ જાય એવી ભયંકર ગરમીમાં 3:00 વાગ્યાથી સ્વામીશ્રીના પસાર થવાનાં દર્શન કરવા માટે ઊમટવું એ અસાધારણ બાબત છે.
સ્વામીશ્રી જ્યારે 4:15 વાગે દર્શન કરવા માટે બહાર પધાર્યા ત્યારે આકાશમાંથી અંગારા વરસી રહ્યા હતા. સ્વામીશ્રી માટે પણ આ અનુભવ આ અવસ્થામાં નવીન જ કહેવાય, કારણ કે આવા સમયે મોટે ભાગે સ્વામીશ્રીને નીકળવાનું હોતું નથી. વળી, આ ઉંમરે આવી ગરમીમાં નીકળવું એ પણ મોટો ભીડો જ કહેવાય. સૌને દર્શનદાન દેતાં દેતાં સ્વામીશ્રી જ્યારે મંદિરના ચોકમાં પધાર્યા ત્યારે ગરમીમાં ઊભેલા હરિભક્તોને જોઈને સ્વામીશ્રીએ લટકું કર્યું. અગાશીમાં પણ કોઈપણ ઓથ વગર હરિભક્તો દર્શન માટે બેઠા હતા. એ જોઈને પણ સ્વામીશ્રીએ આશ્ચર્યભાવ દેખાડ્યો. ઠાકોરજીનાં દર્શન કરીને સૌ પર કૃપાદૃષ્ટિ કરતાં કરતાં સ્વામીશ્રી ગાડીમાં વિરાજ્યા.
અસહ્ય ગરમીમાં પણ સ્વામીશ્રીના દિવ્ય આકર્ષણનો અને હરિભક્તોના દિવ્ય પ્રેમનો સહિયારો અનુભવ માણવા મળ્યો.