બોટાદના સત્સંગી ભગા દોશીના કુટુંબના કેટલાક હરિભક્તો યોગીજી મહારાજને મળવા આવ્યા. સ્વામીશ્રી આફ્રિકા અને લંડનની સત્સંગ યાત્રા કરીને આવ્યા, તે અંગે તેઓ આવતાંની સાથે જ સ્વામીશ્રીની પ્રશંસા કરવા લાગ્યા.
'બાપા, આપે તો ભારે ડંકો માર્યો. શ્રીજીમહારાજના વખતમાં પણ આપણો સત્સંગ ગુજરાતથી બહાર નથી ગયો. તે આપે લંડન સુધી સત્સંગ ફેલાવ્યો.'
'શું બોલો છો ? એવું ન બોલાય !' સ્વામીશ્રીએ એમને બોલતાં એકદમ રોક્યા અને કહ્યું, 'શ્રીજીમહારાજની દૃષ્ટિથી આ બધો સત્સંગ વધે છે. આપણે કોણ? ગાડા નીચે કૂતરું ચાલ્યું જાય ને પછી જાણે 'હું ગાડું હંકારું છું' એમ ન થાય. શ્રીજીમહારાજની દૃષ્ટિથી ડંકો વાગ્યો છે.'
પોતાના ઈષ્ટદેવ શ્રીજીમહારાજની જ શક્તિનું પ્રધાનપણું આગળ કરતાં સ્વામીશ્રીના આ શબ્દોથી તે હરિભક્તો તથા ત્યાં બેઠેલા સૌ કોઈને 'સ્વામીસેવકભાવ'નું સ્વામીશ્રીમાં યથાર્થ દર્શન થયું.