તા. 22-8-2010, બોચાસણ
એક મુમુક્ષુનો ફોન આવ્યો. તેઓ નાના હતા ત્યારે મિત્ર સાથે ટીટોડીનાં બચ્ચાં ઘરે લઈને આવેલા. મૂળ તો બચ્ચાંને રમાડવાનો જ હેતુ હતો, પરંતુ અગાશીમાં લઈ ગયા પછી બચ્ચું પડ્યું ને મરી ગયું. આ વાત મોટા થયા પછી પણ ભુલાતી નથી, દુઃખ લાગ્યા કરે છે અને એના લીધે કોઈ કામમાં સફળતા મળતી નથી એવું લાગે છે.
સ્વામીશ્રીએ તેઓની વાત સાંભળીને આશ્વાસન આપતાં કહ્યું : ‘ઇરાદાપૂર્વક તમે આ કંઈ કર્યું નથી અને જે કંઈ થયું છે એનું મનથી તમે પ્રાયશ્ચિત્ત કરી લીધું છે. એટલે હવે તમારાથી બચ્ચું મરી ગયું છે એવું ન માનવું. એની આવરદા એટલી જ હશે ! આવરદા પૂરી થઈ હશે એટલે મરી ગયું હશે ! એટલે ‘મારાથી આવું થયું’ એવું માનવાની જરૂર નથી. ભગવાને રચના એવી કરી છે, એટલે એ રીતે થયું હશે ! ભગવાનને પ્રાર્થના કરજો, ભજન કરજો, પાંચ માળા ફેરવજો, સુખ-શાંતિ થશે.’
એ મુમુક્ષુ કહે : ‘જન્મોજન્મ તમે જ મારા ગુરુ બનજો.’
સ્વામીશ્રી કહે : ‘તમારે શ્રદ્ધા છે તો ભગવાનનો આશરો દૃઢ રાખજો.’
એ મુમુક્ષુ કહે : ‘કાલસર્પ યોગ છે. 11 લાખ જાપ કરવાનું બ્રાહ્મણ કહે છે.’
સ્વામીશ્રી કહે : ‘ભગવાનનો આશરો છે તો તે દૃઢ રાખીને સ્વામિનારાયણ મહામંત્રની માળા-પૂજા કરજો. પાંચ જનમંગલના પાઠ કરજો, ભગવાન બધું સારું કરશે.’