તા. 29-8-2010, ભાવનગર
કોટિયા ગામના દરબારો મંદિરના પોડિયમ ઉપર દર્શન માટે બેઠા હતા. સ્વામીશ્રીની શુભ ભાવના અને પ્રયત્નોને કારણે કોટિયા ગામમાં સારામાં સારો સંપ થયો હતો. આ દરબારોને જોતાં સ્વામીશ્રી કહે : ‘આશીર્વાદ છે. અહીં આવ્યા, ગામમાં પણ મંદિર થયું છે, ભગવાન વિરાજ્યા છે, તો બધા લાભ લેજો. કોટિયા તો ગુણાતીતાનંદ સ્વામીનું પ્રસાદીનું ગામ છે. એ ગામમાં સુખ-શાંતિ થાય, સંપ રહે, એ આશીર્વાદ છે.’
એ વખતે તો સ્વામીશ્રીએ સૌને દૂરથી જ દર્શનદાન આપ્યાં, પરંતુ પૂજા પછી મુલાકાતકક્ષમાં સ્વામીશ્રી પધાર્યા. મુલાકાતો શરૂ થઈ ગયા પછી તેઓએ કોટિયાના દરબારોને યાદ કર્યા. તાત્કાલિક આ દરબારોને ભેગા કરવામાં આવ્યા ને સ્વામીશ્રી સૌને સામેથી મળ્યા. સ્વામીશ્રી સૌને કહે : ‘તમે અહીં સુધી આવ્યા તો અમારેય મળવું પડે ને ! હવે સત્સંગ બરાબર રાખજો. સંપ બરાબર રાખજો. ગામની પ્રગતિ થશે. વ્યસન-દૂષણ હોય તો એ કાઢજો, એ થાય જ નહીં એની તકેદારી રાખજો.’ આ રીતે સામેથી આ સૌ દરબારોને મળ્યા.