તા. 9-4-2010, ગાંધીનગર
ભૂમિભ્રમણના વચગાળામાં સ્વામીશ્રી કસરત કરતા હોય છે. અત્યારે કસરત ચાલુ થઈ એ દરમ્યાન સામે બેઠેલા સંતોએ કેટલાક બી.એ.પી.એસ. સંસ્થાના ગૌરવપ્રદ પ્રસંગોની વાતો કરી. સ્વામીશ્રી સાંભળી રહ્યા હતા.
કસરત પૂરી થતાં જ સ્વામીશ્રી અંતરના ઊંડાણથી બોલ્યા : ‘શાસ્ત્રીજી મહારાજ અને યોગીજી મહારાજે સંસ્થાનાં મૂળ ઊંડાં નાખ્યાં છે. બે વરસનું છોકરું હોય એનેય સમર્પણની ભાવના છે, બાકી એને કોણ સમજાવવા જતું હશે ? નાના-મોટા સૌને અંદરથી ભાવના છે. બધા જ સંસ્થા માટે સમર્પણ કરે છે.’
વચ્ચે યોગીચરણ સ્વામીએ કેટલાક અન્ય લોકોની વાત કરી કે જે લોકો એમ બોલ્યા હોય કે બી.એ.પી.એસ. સંસ્થાએ જે કર્યું છે એવું આપણે કરી જ ન શકીએ.
સ્વામીશ્રી આ સંદર્ભમાં જ કહે : ‘અહીં તો નાના-મોટા હોય એ બધાને એક જ વિચાર કે સંસ્થા માટે કંઈક કરી છૂટવું છે. બહાર તો ઓફિસરો હોય એ બધા મળે ને છૂટા પડે, એમાં કામ ક્યાંથી થાય ? આ તો શાસ્ત્રીજી મહારાજ અને યોગીજી મહારાજના સંકલ્પ છે, એટલે નાના-મોટા બધાને એમ જ છે કે આ કામ સારું જ કરવું છે. બધી જ રીતે સમર્પણ, દેહે કરીને પણ સમર્પણ અને ધને કરીને પણ સમર્પણ. છોકરાઓ પોતાના વાપરવાના પૈસા બચાવીને અહીં આપે, એમ કે આ સંસ્થાનું કામ કરવું જ છે. પેલામાં તો આૅફિસરો હોય એ આવે ને જુએ ને છૂટા પડી જાય. પણ અહીં તો બહુ ઊંડાણ છે. બધાને ભાવ છે, બધાને સમર્પણ છે. નાના-મોટા બધાને જીવમાં છે એટલે કામ થાય છે. ભગવાનની કૃપા છે એટલે દરેકના જીવમાં ભાવના છે. શાસ્ત્રીજી મહારાજ, યોગીજી મહારાજની પણ કૃપા છે, એટલે કામ થાય છે.’
બ્રહ્મવિહારી સ્વામી કહે : ‘આપનામાં પણ શાસ્ત્રીજી મહારાજ અને યોગીજી મહારાજ છે જ ને ?’
સ્વામીશ્રી કહે : ‘એ છે, એટલે જ એમને લઈને બધું થાય છે ને ! દરેકમાં અક્ષરપુરુષોત્તમનું જ્ઞાન પ્રસરે છે અને કામ થાય છે.’
સ્વામીશ્રી સૌનાં સમર્પણ, ભોગ, ભક્તિ અને નિષ્ઠાના ગુણગાનમાં સરી પડ્યા.