તા. 7-1-2010, મધુભાન રિસોર્ટ
મધુભાન રિસોર્ટના માલિક પ્રયાસવીનભાઈ સ્વામીશ્રી સમક્ષ બેઠા હતા. પોતાના વ્યવસાય અંગે વાત કરતાં તેઓ સ્વામીશ્રીને કહે : ‘એવી ઇચ્છા રહે છે કે જેમ અમે આગળ વધીએ છીએ એમ અમારા કર્મચારીઓ પણ આગળ વધે અને આપને જાણીને નવાઈ લાગશે કે કર્મચારીના યુનિયનનો લીડર જ હું છું. એ લોકો મને સામેથી કહે છે કે અમારા ધાર્યા કરતાં પણ તમે અમને વધારે આપો છો. અને હું પણ માનું છું કે આ મારા જ લોકો છે; પછી ભેદભાવ ક્યાં રહ્યો ? અને એ લોકો મારું રાખે છે પણ એટલું જ.’
સ્વામીશ્રી કહે : ‘કાર્ય કરવાવાળા એ લોકો છે, એટલે ભાગીદારી જ છે એમ જ સમજવું જોઈએ ને ! અને તમે આટલું ધ્યાન રાખો તો એ લોકોને કંપની પણ પોતાની મનાય. ક્યારેક કહેવાનું થાય, પણ ઉતારી પાડવા માટે નહિ, પણ હેતથી આગળ વધારવા માટે. આ બહુ સારી રીત છે.’
સ્વામીશ્રીએ માનવ-સંબંધોની જાણે એક શાશ્વત રીત દર્શાવી દીધી.